O pasado 27 de novembro, o alumnado de Educación Primaria do CEIP Fonte Escura foi de excursión ao edificio central do xornal Faro de Vigo.
Alí foron recibidos por Julia, a encargada de guialos a través do edificio situado en Chapela, na rúa Ángel de Lema y Marina, nome do fundador do xornal. Este fundouse no ano 1853, o que converte ó Faro de Vigo no xornal español máis antigo en funcionamento.
En primeiro lugar ensinoulles a sala de administración, onde fan traballos relacionados coa contabilidade, a publicidade e o sistema de reparto. A continuación puideron ver a sala de redacción, onde non había moitos xornalistas xa que adoitan traballar pola tarde. Despois leváronos a outra sala onde lles mostraron a versión dixital do Faro de Vigo e un vídeo de como funcionan as rotativas, que son as máquinas que imprimen e montan os xornais. Logo foron visitar a sala das rotativas, onde finalmente puideron velas en funcionamento.
Por último, antes de merendar déronlles un agasallo: uns folletos do Pergamiño Vindel, unhas figuras de xogadores do R.C. Celta, un póster do equipo e un conto.
